Yav dhau los, peb tau hais tias peb siv lus los qhia xwm thiab tswvyim rau lwm tus neeg paub. Tiamsis, yog peb muab xyuas kom tseeb ntxiv, peb yuav pom tau tias peb muaj ntau txoj kev siv lus tshaj ntawm qhov qhia xwm thiab tswvyim. Nyob rau hauv no, peb yuav los txheeb txog cov kev siv lus no kom txhijtxhua saib lawv zoo li cas, muaj puastsawg theem, puastsawg txoj los puastsawg phab tiag.

I. KEV SIV LUS YOG DABTSI

Kev siv lus yog muab ib lo lus los ib co lus coj los hais tawm rau lwm tus neeg hnov (los sau tawm rau lwm tus neeg nyeem), es qhia kom tau ib qho xwm los tswvyim rau luag paub, ib yam li thaum peb hais:

- Mus!
- Kavtsij noj!
- Nej yuavtsum nyob xwb.
- Kuv xav kom nej cia li tuaj tamsis no.
- Nws pom tias yog peb ua tau li no, mas yuav zoo heev.

Cov lus no, txawm yuav muaj ib los los ntau los hais sib-raws ua ke, yeej qhia tau xwm thiab tswvyim meej rau lwm tus neeg paub ib yam nkaus. Qhov txawv yog thaum peb hais tsawg lo lus, ces peb qhia tau tsawg qhov xwm los tswvyim. Thaum peb hais ntau lo lus, ces peb qhia tau ntau qhov xwm los tswvyim nkaus xwb.

II. PEB MUAJ PEEVXWM HAIS TAU TXOG TXHUA TSAV,

TXHUA YAM

Peb xav hais txog dabtsi nyob hauv ntiajteb no, los peb yeej hais tau tas. Cov tswvyim tob, cov los ntxhov baum li cas, peb yeej muaj peevxwm txheeb tau los hais rau sawv

daws hnov, sawvdaws paub. Lus yog neeg ib qho twj tseemceeb thiab muaj nqi ntau kawg nkaus li ntag, tiamsis yuavtsum yog peb paub siv kom raug raug caij, raug nyoog thiab raug raws kev siv lus.

(1) Paub siv kom raug raws caij, raws nyoog yog hais yus cov lus kom haum raws li lub caij uas yus nyob, ib yam li:

- Thaum yus pom ntuj tshav, yus kuj hais tias: "Hnub no, ntuj tshav zoo diam.", es yus tsis hais tias " Hnub no, nag los hlob kawg."
- Thaum luag nug tias "Koj lub be hu ua li cas?", yus yuavtsum teb tias "Kuv lub be hu ua.....", es tsis teb tias "Kuv twb muaj 40 xyoo lawm"

(2) Paub siv kom raug raws kev siv lus yog muab cov lus, koog lus, ntu lus, txoj lus thiab toom lus tso kom sib haum, xws li:

- Peb tsis hais tias "Mov noj kuv", tiamsis peb hais tias "Kuv noj mov"
raws li tus kevcai siv lus uas peb ib txwm muaj los.
- Peb tsis hais tias " Tsob ntoo nrad pw lawm", tiamsis peb hais tias "Tsob ntoo nrad vau lawm".

Yog peb siv lus kom raug raws li ob txog kev hais los saum no, ces peb tsis muaj teebmeem txog txoj kev siv lus hlo li. Tiasmsis, qho zaus, peb kuj hais ntau lo lus, qho zaus peb kuj hais tsawg lo lus. Qho zaus, peb kuj hais tej cov lus cov thiab tob, qho zaus, peb kuj hais cov lus ncaj thiab yoojyim. Tej no yog tim cov cai li peb yuav hais rau hauv qab no:

(a) Peb hais lus raws li lub sijhawm uas peb muaj. Thaum peb muaj sijhawm ntau, peb kuj hais ntau lo lus, ntau txoj lus, ntau zaj lus, thaum peb muaj sijhawm tsawg, peb kuj hais ib, ob lo lus xwb los muaj.
(b) Peb hais lus raws li tus neeg uas nrog peb tham:
Yog peb nrog ib tug menyuam yau tham, peb kuj hais cov lus yoojyim thiab hais tsawg lo lus. Yog peb nrog ib tug neeg laus los neeg txawjntse tham, peb kuj hais cov lus cov, lus tob thiab hais ntau lo lus sib raws ua ke.
(c) Peb hais lus raws li qhov xwm los tswvyim uas peb xav qhia:
Thaum peb hais txog ib qho xwm los tswvyim cov, peb kuj siv ntau lo lus, vim peb yuav tau piav ntau tsav, ntau yam, es luag thiaj li yuav to-taub txog qhov peb hais ntawd. Thaum peb piav txog ib qho xwm los tswvyim yoojyim, peb kuj siv tsawg lo lus.

Peb txog cais saum no nej hnub coj peb hais lus, qhia peb siv lus. Peb yuav hais lus ntau los tsawg, peb yuav hais lus yoojyim los cov, yog tim cov cai saum no nkaus xwb.

III. PEB MUAJ OB PHAB KEV SIV LUS

Nyob hauv peb lub neej, peb muaj ntau txoj kev siv lus. Yog peb hais qhov yoojyim thiab ncaj xwb, ces peb hais tias peb siv lus los qhia xwm thiab tswvyim. Tiamsis, yog peb yuav muab hais kom txhijtxhua, kom meej ntxiv, ces peb hais tau tias neeg muaj ob phab kev siv lus li no:

(1) Kev siv lus theem qis
(2) Kev siv lus theem siab

(a) Siv lus los qhia xwm thiab tswvyim
Thaum yus pom ib qhov xwm los hnov luag hais txog ib qho xwm uas tseemceeb, muaj nqi rau yus, yus kuj hais qhia rau lwm tus neeg paub. Thaum yus ho xav tau ib zag tswvyim los hnov luag hais txog ib co tswvyim zoo los muaj nqi rau yus, yus kuj hais qhia rau lwm tus neeg paub thiab:

- Ib co Hmoob tuaj txog nrad. (qhia xwm)
- Kuv xav kom koj mus xwb. (qhia tswvyim)

(b) Siv lus los nug xwm thiab tswvyim
Thaum peb xav paub txog ib qho dabtsi, ib qho xwm los tswvyim, peb kuj siv lus los nug lwm tus neeg uas ntxim yuav paub:

- Qhov nov yog dabtsi? (nug txog ib qho khoom)
- Leej twg tuaj txog nrad? (nug txog ib tug neeg)
- Puag-ta, neb hais tias neb pom dabtsi no? (nug txog ib qho xwm)
- Koj puas nrog peb mus? (nug txog ib qho tswvyim)

(c) Siv lus los txib, los qhia lwm tus neeg ua haujlwm
Txoj kev siv lus no kuj muajntsis zoo li qhia tswvyim. Tiamsis, tus hais muaj ib qho haujlwm nyob rau ntawd rau tus neeg uas nws hais lus rau ua:

- Mus qhib qhovrooj.
- Kuv xav kom koj pab sau ib tsab ntawv rau kuv.

(d) Siv lus los qhia siab, qhia ntsws
Thaum peb muaj kev ntxhov siab, chim siab los zoo siab, qab siab, peb kuj qhia rau lwm tus neeg paub thiab:

- Ha, ha... lawv ua tau zoo saib kawg li.
- Bav... ua cas es nws pheej tsis txawj tuaj ne!

Kev siv lus phab siab yog cov kev siv lus uas cov, es peb yuavtsum tau kawm tso, peb mam li yuav siv tau. Lawv zoo li no:
(a) Siv lus los ua kev lomzem: dabneeg, kwvtxhiaj, txhiaj-txhais, zaj nkauj, zaj ncas, zaj raj, zaj qwv blooj,...
(b) Siv lus los ua kevcai: kab tshoob, kev kos, kev pe tsiab, kev thov luag dag, luag zog...
(c) Siv lus los kho mob, kho nkees: ua neeb, ua khawvkoob, daws dab, hu plig, khi tes,...
(d) Siv lus los dab, ua qhua: zaj qeej, zaj qhuab-ke, zaj txiv-xaiv, kev ua nyuj dab, kev tso plig,...

Cov kev siv lus phab siab no, peb yuav tsis sau rau hauv no, vim muaj ntau tsav, ntau yam heev. Peb tsis muaj peevxwm yuav sau kom tau tas rau hauv no. Yog leej twg xav paub, nws mus nrhiav xyuas tau Txiv Plig Nyiaj-Pov cov ntawv. Lawv kuj sau tau ntau phau ntawv hais txog Hmoob tej txujci, kevcai dabqhua, dabneeg, kwvtxhiaj no lawm.

Yog thaum twg, peb ho muaj sijhawm txaus, peb mam li muab Hmoob tej txujci no coj los xyuas, es txheeb seb lawv ho zoo li cas, hais txog dabtsi, muaj qhov zoo, qhov cov, qhov tob li cas thiab peb yuav siv li cas mus lawm yav tom ntej.

IV. PEB MUAJ TSIB THEEM KEV SIV LUS Peb tau hais los lawm tias peb muaj ob phab kev siv lus: phab qis muaj plaub txog kev siv lus, phab siab los muaj plaub txog kev siv lus. Zaum no, peb ho yuav hais ntxiv tias peb muaj rau theem kev siv lus nyob rau hauv plaub txog siv lus hauv theem qis saum no. Lawv zoo li no:

i. Kev siv lo lus
ii. Kev siv koog lus
iii Kev siv ntu lus
iv Kev siv txoj lus
v Kev siv zaj lus

i. KEV SIV LO LUS

Nyob hauv peb txoj ke siv lus, tsujtsawg zaus, peb thiaj li hais ib lo lus nkaus xwb.Qhov peb hais ib lo lus nkaus xwb yog tim peb maj heev, los peb teb lwm tus neeg cov lus:

- Mus! Noj! Sawv!
- Aws. Yog. Zoo.

Txoj kev siv ib lo lus li no nkaus xwb kuj tsis muaj teebmeem dabtsi. Yog peb siv kom raug lub caij, lub sijhawm ces nws yeej qhia tau xwm los tswvyim zoo tib yam nkaus li kev siv ntau lo lus.

ii. KEV SIV KOOG LUS

Kev siv koog lus los kuj xws li kev siv lo lus thiab, peb tsis siv ntau puastsawg. Qho zaus xwb peb thiaj li siv nws, ib yam li thaum maj, peb teb lwm tus neeg los peb ho tsis tshua xav hais lus:

- Txhob mus!
- Tsis zoo.
- Tsev-kawm-txujci.

Tabtxawm qho zaus peb yuav hais lus li no xwb los, tus hnov yeej to-taub zoo lawm, yog peb hais kom rau lub sijhawm. Yog nyobnyob, peb cia li hais cov lus no tawm los, nws kuj xav tsis thoob li thiab.

iii. KEV SIV NTU LUS

- Mus lias!
- Kavtsij noj!
- nram lub zos nrad.
- Tsis yog hlo li.

Qhov peb siv tej ntu lus li no los yog vim peb pom tias tus nrog peb tham yeej yuav to-taub, paub zoo txog tej ntu lus zoo li no. Lub sijhawm yuam kom peb siv cov ntu lus zoo li no lawm.

iv. KEV SIV TXOJ LUS

- Neeg txawj hais lus.
- Peb yog Hmoob.
- Lawv muaj kwvtij coob.
- Nws xav kom peb mus xyuas nws.
- Kuv pom tias qhov nej ua no tseem zoo tsis tshua heev.
- Yog peb rau siab khwv, ces peb lub neej yeej yuav ntseg xwb.

Ib txhia txoj lus kuj yoojyim, ib txhia txoj lus kuj cov heev. Ib txhia txoj lus, peb hais los nug lwm tus txog qhov peb tsis paub. Ib txhia, peb hais los txib neeg, thov neeg ua haujlwm rau peb. Ib txhia, peb hais los qhib siab, qhib ntsws, qhia txog qhov peb nyiam los tsis nyiam.Lawv zoo li no:

- Koj puas mus? - Neb nyiam qhov nov los?
- Lawv twb tuaj txog lawm, puas yog?
- Los tom no seb!
- Kuv xav kom koj ua txoj haujlwm no rau kuv.
- Lub zos no ntxim nyob kawg nkaus!
- Phib! niag tsw qia, kavtsij khiav mus deb!

Tej kev siv cov txoj lus zoo li no yeej muaj rau txhua lub caij. Lub caij twg, ntxim hais txoj twg, peb yeej siv txoj ntawd, vim peb yeej ntsuas tau tias yuav hais txoj lus twg thiaj li yuav qhia tau xwm thiab tswvyim tseeb, txoj lus twg thiaj li yuav nug tau xwm thiab tswvyim meej, txoj lus twg thiaj yuav qhia tau haujlwm rau luag paub zoo thiab qhib tau yus lub siabntsws rau luag pom tseeb.

v. KEV SIV ZAJ LUS

Qho zaus, peb kuj hais ntau nqe lus ua ke, es qhia kom tau ib zag lus rau luag hnov. Txhua zaj lus yeej muaj ntau qhov xwm, ntau qhov tswvyim uas nyob sib txuas zws. Tshaj ntawd, nws muaj qhov pib thiab qhov xaus, xws li Hmoob tej dabneeg, tej kev taug xwm, taug neeg lub keebkwm, tej kev piav txujci, tswvyim... Peb muab pivtxwv mentsis rau ntawm no li no:

Muaj ntau tus Hmoob nej hnub hais tias vim peb Hmoob phem, tsis mloog lus, tsis sib pab, es peb thiaj li tsis muaj tebchaws. Tiamsis, qhov tseeb tiag kuj tsis yog li ntawd.Yog peb ua zoo los saib cov neeg uas muaj tebchaws, peb yuav pom tau tias lawv txawv peb lawm ntau.
Ua ntsej tshaj plaws, lawv nyob rau tej chaw tiajtus, ces muaj av ua noj, ua haus zoo, ua tau qoob ntau, tseev txaus noj, txaus haus. Ntxiv ntawd, lawv nyob rau qhov chaw qub nkaus xwb, ces lawv thiaj tsim tau vajtse zoo, kho tau nroog kom dav thiab muaj kev mus-los sib cuag yooj yim.
Tsis ntev, lawv kuj muaj ntawv los kawm, muaj txujci los siv thiab muaj kevcai los taug. Tej no pab kom lawv lub neej zoo ntxiv, muaj tswv- yim, kev txawjntse ntau ntxiv thiab coj tau lub siab tus. Qhov nov yog thawj ruam ntawm txoj kev vammmeej, ntawm txoj kev muaj tebchaws. Thaum ntau lub zos, ntau lub nroog los sib sau ua ke, es muaj kev noj haus dav, muaj kevcai nruj los tuav lawv lawm, lawv thiaj li yuav nyob tau ua ke thiab sib koom tau ua ib lub tebchaws.
Yog peb ho los xyuas peb Hmoob lub neej, mas tseem nyob deb ntawm qhov peb hais los no heev. Peb lub neej , ces yog tsiv thiab tsiv, nyob dhau lub roob rau lub roob, nyob dhau lub hav rau lub hav. Peb yim nyob qhov chaw deb, qhov chaw muaj havzoov, mas peb yim zoo siab xwb. Peb yeej tsis xav tias peb yuav xyaum ua raws li luag seb peb puas zoo li luag, puas vammeej xws li luag. Thaum zoo li no, peb tseem nyob deb ntawm txoj kev muaj tebchaws heev.

Txoj kev siv zaj lus no kuj muaj raws li lub caij, lub nyoog thiab xwb. Thaum txog lub caij uas ntxim hais tej zaj lus zoo li no, xws li thaum yus hnov luag hais ib co lus tawm tias " peb Hmoob phem, es peb Hmoob thiaj tsis muaj tebchaws", ces yus yuav tau hais los tau sau cov lus no tawm rau luag paub. Ib tug kuj hais txawv mus ib yam, nyob ntawm qhov nws tau kawm, tau hnov los, los nws xav tau xwb. Qho tus kuj tsis paub dabtsi, ces nws piav tsis tau dabtsi tawm los. Qho tus kuj tsis xav tham, tsis xav hais lus, ces nws kuj qhia tsis tau dabtsi rau lwm tus neeg paub thiab.

Nypb hauv txoj kev sau zaj lus, luag hais ib co tswvyim uas muajntsis sib xws nyob ua ke ua ib suam, xws li zaj lus uas peb hais los saum no muaj plaub suam. Peb hu tej suam lus no ua nqe lus. Qhov luag sau lus ua tej nqe no yog xav kom tus nyeem to-taub zoo txog luag cov xwm los tswvyim thiab ua rau phaj ntawv zoo saib, zoo nyeem.

Kev siv lus Hmoob Dawb, peb tsuas hais los xaus li no xwb. Yog lwm hnub, peb txheeb tau li cas ntxiv, mam li hais ntxiv tuaj rau sawvdaws paub.