Thaum peb hais ntau lo lus sib-raws zws, es qhia tau ib qho xwm los tswvyim tseeb rau lwm tus neeg paub, ces yog peb siv txoj lus. Nyob rau hauv ntu no, peb yuav qhia tias txoj lus yog dabtsi, muaj puastsawg hom txoj lus thiab kev txuas ntau lo lus los ua txoj lus.

I. TXOJ LUS YOG DABTSI

Txoj lus yog ntau lo lus, ntau koog lus los ntau ntu lus uas peb muab hais sib raws zws, es qhia tau ib qho xwm los tswvyim tseeb, muaj chaw txawb, chaw rau, muaj hauvpaus, muaj ntsis, los yog muaj tus tswv-xwm (subject) thiab qhov peb piav txog tus tswv-xwm (predicate). Tus tswv-xwm yog qhov peb xub hais txog, ces ntxiv ntawd, peb mam li piav tias nws zoo li cas (lub meejmom), nws ua dabtsi (lub yeebyam), nws yog dabtsi (lub ntsiab) thiab nws muaj dabtsi (lub neej), xws li:

(1) Tsob ntoo nrad siab kawg.
(2) Noog ya saum ntuj.
(3) Peb yog Hmoob.
(4) Lawv muaj nyiaj.

Tus tswv-xwm
Lub meejmom
Lub yeebyam
Lub ntsiab
Lub neej

Raws li peb pom los no, txhua txoj lus uas peb hais tawm los yuavtsum muaj tus tswvxwm thiab qhov peb piav txog tus tswvxwm ntawd tas mus li. Yog peb muab ib qho tshem tawm lawm, ces peb txoj lus tsis meej li lawm, ib yam li:

(5) Tsob ntoo nrad.
(6) saum ntuj.

Ob txog lus no tsis puv, qhia tsis tau dabtsi tseeb rau peb paub, vim ib txog tsis muaj meejmom (Tsob ntoo ntawd zoo li cas ), ib txog tsis muaj tus tswv-xwm (Dabtsi ya saum ntuj).

Tiamsis, qho zaus, yog peb maj heev los peb tsis xav hais lus ntau, ces peb yuav tsis hais txog tus tswv-xwm, yog peb pom tias tus mloog twb paub txog nws zoo lawm, ib yam li:

(7) Los ntawm no.
(8) Tsam no, tshaib plab kawg li lawm.

Txawm tus hais ho hais tau li no xwb los, tus mloog yeej paub zoo tias tus hais hais txog dabtsi los leej twg lawm. Tiamsis, yog yuav kom txoj lus tseeb tiag, nws yuavtsum hais li no:

(9) Koj los ntawm no.
(10) Tsam no, peb tshaib plab kawg li lawm.

II. PEB MUAJ PLAUB HOM TXOJ LUS

Nyob hauv peb lub neej, ib hnub no, peb siv txog ntau pua, ntau txhiab txoj lus. Txoj yuav cov, yuav yoojyim, yuav ncaj, yuav nkhaus li cas los muaj. Luag hais tias peb tsis muaj peevxwm yuav los txheeb tau txhua txoj lus, vim lawv muaj ntau dhau thiab cov dhau heev lawm. Txawm peb yuav txheeb tas peb tiam neej los, peb yeej paub tsis tau tias neeg muaj peevxwm hais tau puastsawg txoj lus tiag. (The number of sentences is infinite). Txawm li ntawd los, peb kuj faib tau neeg cov txoj lus ua plaub hom li no:

1. TXOJ LUS QHIA

Txoj lus qhia yog txoj lus uas peb siv los qhia xwm thiab tswvyim rau lwm tus neeg paub. Lawv zoo li no:

- Lawv twb mus lawm.
- Puag ta, nws hais rau kuv tias lawv twb mus lawm.
- Kuv xav tias lawv tseem tsis tau mus.

2. TXOJ LUS NUG

Txoj lus nug yog txoj lus uas peb siv los nug lwm tus neeg txog ib qho xwm los tswvyim uas peb xav paub txog. Lawv zoo li no:

- Koj puas mus?
- Lawv mus lawm los
- Lawv tseem tsis tau mus, puas yog?
- Koj puas xav tias lawv yuav mus?

3. TXOJ LUS TXIB

Txoj lus txib yog txoj lus uas peb siv los txib lwm tus neeg ua ib qho haujlwm rau peb. Txoj lus txib zoo li no:

- Los nram no!
- Koj pab qhib lub qhovrooj ntawm koj seb!
- Kuv xav kom nej tuaj pab ua ib qho haujlwm rau kuv.

4. TXOJ LUS QHIA SIAB

Txoj lus qhib siab yog txoj lus uas peb siv los qhia txog qhov peb nyiam los peb ntxub, qhov peb txaus siab los chim siab. Lawv zoo li no:

- Ua cas es koj yuav zoo ua luaj li
- Niag tsov tom ntawd mas, kuv laj ntxub nws heev hwv lawm lau!
- Koj ntsia seb: Hmoob tuaj dhia qaib coob kawg nkaus li, tus
yuav hnav zoo li cas los muaj tas nrho.

Txhua txoj lus uas peb hais tawm los yuavtsum yog ib ntawm plaub hom no xwb. Tsuastab, peb siv txoj lus qhia ntau tshaj plaws (70% ntawm peb txoj ke siv lus). Lwm hom txoj lus, peb yeej siv tsawg dua.

III. KEV TXUAS TXOJ LUS

Yog peb muab txoj lus qhia los ua qauv (vim peb siv nws ntau dua), peb yuav pom tau tias kev txuas txoj lus kuj zoo mus li no:

(1) Cov lus uas peb siv los ua txoj lus lub hauvpaus muaj li no:

- be: Neeg txawj hais lus.
- koog be: Neeg-tawv-dawb muaj kev vammeej dav.
- ntu be: Tus neeg ntawd yog Hmoob.
Kev ua noj, ua haus tsis yoojyim.
- tuav-be: Koj puas paub nws?
- koog tuav-be: Nyuag-yaus tsis paub dabtsi.

(2) Cov lus uas peb siv los ua txoj lus lub ntsis kuj muaj li no:

- meejmom: Nws zoo.
- koog meejmom: Nws kuj zoozoo.
- ntu meejmom: Nws yeej zoo.
- yeebyam: Nws mus.
- koog yeebyam: Nws tsis nyob.

(3) Lwm hom lus uas peb siv los txuas txoj lus kuj muaj li no:

- ntxiv: Nws khiav ceev.
- theem: Nws loj diam.
- xaus: Nws zoo hos.
- chaw: Nws nyob nrad.
- sijhawm Nws yuav mus taigkis.

(4) Yog peb xav kom peb txoj lus meej ntxiv, peb kuj muab cov lus saum no los sib

txuas ntxiv li no:

- ntxiv + theem: Nws khiav ceev diam.
- ntxiv + theem + xaus: Nws khiav ceev diam hos.
- chaw + sijhawm: Nws yuav mus nrad tamsis no.

Kev txuas txoj lus, peb tsuas hais mentsis li no los ua qauv xwb. Peb cov kev xuas txoj lus yeej muaj ntau tshaj ntawm no, tiamsis vim peb cov txoj lus muaj dhau heev lawm, ces peb yeej txheeb tsis tas hlo li. Txawm li cas los, peb ho txheeb txog lwm qhov, lwm phab ntawm txoj lus mus ntxiv lawm yav tom ntej.

IV. TXOJ LUS YOOJYIM

Txoj lus yoojyim yog txoj lus uas muaj ib lo meejmom los yeebyam, ib koog meejmom los yeebyam, ib ntus meejmom los yeebyam nyob rau hauv xwb. Lawv zoo li no:

- Lawv zoo hos.
- Nws tsis tuaj rau ntawm peb zos lawm.
- Taigkis, peb yuav mus luaj teb bleg rau nram ntug dej Naj Nyeej.

Peb txog lus no, txawm yuav luv, yuav ntev li cas los, tsuas muaj ib lo meejmom (zoo), ib koog yeebyam (tsis tuaj) thiab ib ntu yeebyam (yuav mus luaj) nkaus xwb. Peb hu txhua txoj lus uas zoo li no ua txoj lus yoojyim tas nrho.

V. PEB MUAJ NTAU TXOJ LUS YOOJYIM

Cov txoj lus yoojyim uas peb nej hnub hais kuj muaj ntau txoj sib-txawv li no:

(1) Txoj lus yoojyim puv: Nws mus lawm.
Lub nroog no loj heev.
(2) Txoj lus yoojyim tshab: Nws noj mov.
(3) Txoj lus yoojyim tshwm: Nws pub nyiaj rau kuv.
(4) Txoj lus yoojyim rov: Nkawv sib ntaus.
(5) Txoj lus yoojyim ntxeev: Nws mag lawv cem.
Nws raug lawv tua.

Txoj lus yoojyim puv yog txoj lus uas muaj yeebyam los meejmom nyob rau hauv xwb, tiamsis yeej qhia tau xwm thiab tswvyim tseeb rau peb paub lawm.

Txoj lus yoojyim tshab yog txoj lus uas yuavtsum muaj be los tuav-be nyob raws qab yeebyam tas mus li, es thiaj qhia tau xwm thiab tswvyim tseeb rau peb paub.

Txoj lus yoojyim tshwm yog txoj lus uas muaj lo lus rau nyob tom qab yeebyam, es qhia tias qhov xwm uas peb hais txog ntawd mus tshwm rau ntawm leej twg, qhov twg.

Txoj lus yoojyim rov yog txoj lus uas muaj koog yeebyam: sib ntaus, sib ceg.... nyob rau hauv. Txoj lus no qhia tias ob tog tswv-xwm puavleej ua qhov xwm ntawd rov rau nkawv ris.

Txoj lus yoojyim ntxeev yog txog lus uas muaj lo lus: mag, raug nyob rau hauv. Peb muab txoj lus no ntxeev ntawm txoj lus tshab los, xws li: Nws ntaus kuv (yog txoj lus tshab), peb muab ntxeev ua : Kuv mag nws ntaus, vim peb xav hais txog tus raug qhov xwm ntawd ua ntej (vim peb pom tias nws yog xwm uas tseemceeb dua).

VI. TXOJ LUS COV

Txoj lus cov yog txoj lus uas muaj ntau lo meejmom los yeebyam, ntau koog meejmom los yeebyam thiab ntau ntu meejmom los yeebyam. Lawv zoo li no:

- Ib txhia zoo, Ib txhia phem.
- Nws xav kom peb muaj neej zoo.
- Lawv pom-zoo tias lawv yuav tuaj nrog peb sib tham txog cov haujlwm tseemceeb no.

Peb txog lus no muaj ntau lo meejmom (zoo, phem), ntau lo yeebyam (xav, muaj), ntau koog yeebyam (pom-zoo, sib-tham) nyob rau hauv. Lawv qhia tau ntau qhov xwm, ntau lub tswvyim ua ke. Yog li ntawd, peb thiaj li hu lawv ua txoj lus cov.

VII. TXOJ LUS COV MUAJ NTAU TOOM LUS

Txhua txoj lus cov yeej muaj ob los ntau toom lus (clause). Ib toom lus yog ib co lus uas muaj ib lo meejmom los yeebyam, ib koog meejmom los yeebyam, ib ntu meejmom los los yeebyam nyob rau hauv. Peb siv ntau toom lus los sib txuas ua ke, ces peb thiaj li hais tau txoj lus cov. Peb muab tau pivtxwv li no:

- Leej txi xav kom nws cov tub txawj ntawv, ces nws thiaj li xa lawv mus kawm ntawv rau nram nroog.

Txoj lus cov no muaj peb lo yeebyam (xav, txawj, kawm ), thiab ib koog yeebyam (xa mus) ces peb hais tias nws muaj plaub toom lus li no:

- Toom 1: Leej txi xav
- Toom 2: kom nws cov tub txawj ntawv
- Toom 3: ces nws thiaj li xa lawv mus
- Toom 4: kawm ntawv rau nram nroog.

Cov toom lus no yuavtsum nyob sib txuas zws li no, es thiaj sib koom ua tau ib txog lus cov. Yog peb xav muab lawv rhuav los tshem mus nyob rau lwm qhov, peb kuj muaj peevxwm ua tau, tiamsis cov ntsiab lus yuav txawv zog qhov qub lawm, xws li:

- Leej txi xav kom nws cov tub txawj ntawv. Yog li ntawd, nws thiaj li xa lawv mus kawm ntawv rau nram nroog.
- Vim leej txi xav kom nws cov tub txawj ntawv, ces nws thiaj li xa lawv mus kawm ntawv rau nram nroog.

VIII. PEB MUAJ NTAU TXOJ LUS COV

Cov txoj lus cov uas peb nej hnub siv kuj muaj li no:

(1) Txoj lus cov txuas yog ntau txoj lus uas muab hais sib txuas ua ke, es qhia

tau ntau qhov xwm los tswvyim. Nws zoo li no:

- Ib txhia ua haujlwm, ib txhia kuj nyob dawb.
- Nws nej hnub nyob, noj, pw thiab zaum nkaus xwb.
- Hmoob nyiam nyob toj siab, tiamsis Blog nyiam nyob chaw qis.

(2) Txoj lus cov tshooj yog txoj lus uas muaj lo lus uas nyob rau hauv, es piav kom tau ib qho dabtsi los tshooj ntxiv rau cov xwm los tswvyim uas tus hais txog ntawd. Nws zoo li no:

- Tus neeg uas zaum nrad yog kuv ib tug phoojywg.
- Cov khoom uas lawv nqa tuaj nyob qhov twg?

Qho zaus, peb kuj tsis siv lo lus uas nyob rau hauv txoj lus cov tshooj no, xws li:

- Tus neeg koj pom nrad yog kuv ib tug phoojywg.

(3) Txoj lus cov nthuav yog txoj lus cov uas muaj lo lus tias nyob rau hauv, es nthuav kom tau ntau qhov xwm los tswvyim ntxiv. Nws zoo li no:

- Peb pom tias qhov nws hais mas zoo heev. - Nws yeej paub tseeb tias lawv yuav tsis tuaj xyuas nws ntxiv lawm.

Ib txhia Hmoob nyiam hais txoj lus cov nthuav mus li no:

- Nws pom hais tias....
- Peb paub hais tias...

Tsuastab yog peb muab ua zoo xyuas, peb yuav pom tias lo lus hais nyob ua ntej tias ntawd tsis muaj nqi dabtsi. Nws zoo hais, es peb lam hais xwb.

(4) Txoj lus cov ntseg yog txoj lus cov uas muaj lo lus kom nyob rau hauv, es qhia tias peb xav ua ib qho xwm los tswvyim kom tiav, kom ntseg. Nws zoo li no:

- Nws xav kom peb mus xyuas nws.
- Peb nyiam kom sawvdaws muaj neej zoo.

Ib txhia Hmoob kuj hais txoj lus cov ntseg no yuamkev mus li no:

- Nws pheej kom kuv mus xwb.

Qhov tseeb tiag, peb yuavtsum hais ib lo yeebyam ua ntej kom tas mus li xws li:

- Nws pheej yuam kom kuv mus xwb.
- Nws pheej hais kom kuv mus xwb.
- Nws pheej xav kom kuv mus xwb.

Tom qab peb paub tias txoj lus yog dabtsi, muaj lo lus, koog lus, ntu lus thiab toom lus zoo li cas los sibtxuas uas txoj lus lawm, peb ho yuav muab txoj lus los rhuav, cais (analysis), txheebxyuas dua seb nws puag yog li peb hais tiag. Yog peb hais raug lawm, ces peb cais tau txhua txoj lus, peb paub tau txhua txoj lus, txawm nws yuav cov los yuav yoojyim baum li cas. Peb muab tau pivtxwv li no:

(1) Taigkis, kuv yuav mus nram nroog.
Txoj lus no yog ib txog lus yoojyim. Nws muaj:
(a) tus tswv-xwm : kuv
(b) qhov haujlwm uas tus tswvxwm ua: yuav mus nram nroog
(c) lub sijhawm: taigkis

Cov lus uas peb muab sib txuas ua txoj lus no muaj li no:
- taigkis: sijhawm yav tom ntej
- kuv : tuav-be, thawj tus neeg
- yuav mus : ntu yeebyam {yuav: pab, mus: yeebyam}
- nram nroog : ntu be {nram: chaw, nroog: be}

(2) Tsob ntoo no yiag kawg, ntxim ua nqaj-tse diam.

Txoj lus no yog ib txog lus cov txuas, muaj ob toom lus nyob rau hauv:
- toom lus ib: Tsob ntoo no yiag kawg.
- toom lus ob: ntxim ua nqaj-tse diam.

Toom lus ib muaj: - tus tswvxwm: tsob ntoo no
- tus tswvxwm lub meejmom: yiag kawg
Toom lus ob muaj:
- tus tswvxwm: tsob ntoo no
- tus tswvxwm lub yeebyam: ntxim ua nqaj-tse diam

Cov lus uas peb siv los ua ob toom lus no muaj li no:
- tsob ntoo no: ntu be {tsob:cais, ntoo:be, no:chaw}
- yiag: meejmom
- kawg : theem
- ntxim ua: ntu yeebyam {ntxim: pab, ua: yeebyam)
- qhab-tse: koog be {nqaj: be, tse: be}
- diam: theem

Kev txheebxyuas txoj lus, peb tsuas hais los tso tseg li no xwb. Yog leej twg xav paub ntxiv, nws yeejmeem nyeem tau luag tej ntawv uas qhia txog txoj lus ntxiv. Vim peb cov lus Hmoob tseem tsawg heev, ces peb yuav piav tsis tau txhijtxhua li lwm haiv neeg piav txog luag cov lus los txoj lus.